Веќе со месеци терапевтите забележуваат зголемен број на клиенти кои страдаат од анкциозност, депресија и панични напади. Пандемијата со ковид-19, финансиската несигурност и постојаното чувство дека опасноста е зад аголот, несомнено си го сторија своето. Постојат голем број на техники за емотивна регулација и начини за соочување со стресот, но важно е луѓето проактивно да преземат чекори кон подобрување на менталното здравје – тоа може да е терапија, медитација, здрава исхрана или физичка активност.
„The Wall Street Journal“ сподели совети од експерти и неколку чекори што би можеле да ги примените во вашиот ментален фитнес режим.
Направете го сонот приоритетен
На возрасен човек му се потребни 7-8 часа квалитетен сон. Според научниците, константен режим на заспивање и будење му праќа на мозокот сигнали дека „светот е безбеден и сигурен“, што помоага да се намали анкциозноста.
Поставете си рутина
Станувајте во исто време секој ден, облечете се, следете утрински ритуал (многумина водат дневници или пополнуваат дневни планери), јадете оброци и вежбајте секогаш во исто време во денот. Ова помага да задржите чувство на предиктабилност во време кога ситуациите делумно „излегуваат од контрола“.
Внимавајте како се третирате себеси
Истражувањата покажуваат дека луѓе кои имаат поголемо трпение за себе, се чувствуваат посреќно и помотивирано. Честопати покажуваме разбирање и сочувство кон сите останати освен нас самите. Затоа е потребно да се третираме себеси како што би го третирале нашиот најдобар пријател. Не заборавајте дека секој минува низ тешки моменти. Тоа ќе ви помогне да го намалите стресот и полесно да се поврзете со луѓето околу вас.
Раздвижете го телото
Голем број научни истражувања се доказ за тоа дека аеробикот помага при намалување на тензијата и омалаксаноста, а ги подобрува концентрацијата, сонот, расположението и самодовербата. Експертите посочуваат дека вежбање во природа го намалува стресот и лачењето на кортизолот, го регулира крвниот притисок и го подобрува расположението.
Ставете се на „медиа“ диета
Секојдневно сме „бомбардирани“ со негативни вести и тоа несомнено влијае врз начинот на кој нашето тело и ум реагираат. Филтрирајте ја содржината што ја консумирате, исто како што би правеле доколку би „броеле калории“, а би било одлично доколку можете да одредите временски интервали кога сосебма би го исклучиле телефонот.
Одберете хоби паметно
Активности кои ни даваат чувство на „значајност“ и „исполнетост“ значително го подобруваат менталното здравје. Такво хоби би било: волонтерство, учење нов јазик, учење нов инструмент или интерес за нов спорт.
Култивирајте здрави меѓучовечки односи
Луѓето кои одржуваат силни врски со други луѓе се емотивно поздрави. Поставете си задача да се реконектирате со пријателите и семејството, обидете се еднаш дневно да се видите или чуете со барем една личност – прашајте што е ново, и обидете се да зборувате за теми кои ќе го одвлечат вниманието од негативните вести.
